इंडियन प्रीमियर लीगच्या (INDIAN PREMIER LEAGUE) येत्या सीझनसाठी खेळाडूंचा लिलाव सुरू आहे. संघ मालकांकडून खेळाडू आपल्या टीममध्ये घेण्यासाठी लावल्या जाणाऱ्या बोलीवर कोट्यावधींची उड्डाणे सुरू आहेत. चेन्नईत जगभरातील २९८ खेळाडूंच्या निवडीसाठी ८ संघ मालक ठाण मांडून बसले आहेत. आतापर्यंत अनेक खेळाडूंवर ५ कोटी रुपयांहून अधिक बोली लावण्यात आली आहे. तर काही खेळाडू अजूनही ‘अनसोल्ड’ ठरले आहेत. इंग्लडचा अष्टपैलू खेळाडू मोईन अलीला (MOIN ALI) चेन्नई सुपरकिंग्सने तब्बल ७ कोटी रुपये देऊन खरेदी केले आहे. चेन्नईन पंजाब किंग्सला जोरदार टक्कर देत बोलीचं पारड आपल्या बाजून पालटवलं असल्याने सर्वांना आश्चर्याचा धक्का बसला आहे. पंजाबने झिया रिचर्डसनला १४ कोटी,राजस्थान रॉयल्सने क्रिस मॉरिसला १६.२५ कोटी रुपयांमध्ये खरेदी केलं आहे. खेळाडूंवर लावण्यात येणारी कोट्यावधी रुपयांची बोली सर्वसामान्यांना जनतेसाठी अचंबित करणारा विषय ठरत आहे.
भारतीय खेळाडूंना किती रुपयांचा टॅक्स बसतो?
खेळाडूंवर बोलीवेळी कोट्यावधी रुपयांचा वर्षाव होत असला तरी प्रत्यक्षात खेळाडूंच्या हातात तेवढीच रक्कम मिळते अस होत नाही. खेळाडूंना इतर सामान्य नागरिकांप्रमाणेच सरकारचा टॅक्स द्यावा लागतो. बोलीवेळी मिळणाऱ्या रक्कमेतून टीडीएसची कपात केली जाते. भारतीय खेळाडूंना लिलावातून मिळणाऱ्या रकमेतून टीडीएसची कपात करण्यात येते. यावेळी एकूण रकमेच्या दहा टक्के टीडीएसच्या नावे वजा केले जातात. यानंतर खेळाडूंना आयटीआर दाखल करावा लागतो. यामध्ये खेळाडूंचे इतर उत्पन्न आणि खर्चाचा हिशोब मांडलेला असतो. त्यामुळे खेळाडूंना निव्वळ उत्पन्नाच्या आधारावर कर द्यावा लागतो. टीडीएसची गणना केवळ बोली रकमेच्या आधारावरच केली जाते.
विदेशी खेळाडूंच्या टॅक्सचं मापन कस करतात?
भारताबाहेरील खेळाडूंना भारतात मिळणाऱ्या उत्पन्नावर २० टक्के टीडीएस द्यावा लागतो. मात्र, विदेशी खेळाडूंना भारतीय खेळाडूप्रमाणे टीडीएस व्यतिरिक्त अन्य कोणताही करचा भरणा करावा लागत नाही. विदेशी खेळाडूंना केवळ भारतातील उत्पन्नावरच कर द्यावा लागतो.त्यासाठी त्यांना आयटीआर दाखल करण्याची आवश्यकता नसते.
काँट्रॅक्ट कशा बद्दल असते?
सनदी लेखापाल सौरभ शर्मा यांच्या मतानुसार, खेळाडूंना कर कपातीनंतर नेमका किती पैसा मिळतो याचा प्रत्यक्ष अंदाज लावणे कठीण काम आहे. बोली रक्कम ही खरंतर बेस प्राईस स्वरुपात असते. खेळाडूंचे कंपनीसोबत विविध प्रकारचे करार असतात. खेळाडूंसोबत केलेल्या संबंधित करारानुसार त्यांना त्याचे पैसे मिळतात. कोणत्याही खेळाडूचा प्लेईंग- 11 मध्ये सहभाग न झाल्यास त्याचे त्याला वेगळे पैसे देण्यात येतात. खेळाडूंच्या करारावरच त्यांना मिळणाऱ्या मूळ रकमेचे स्वरुप ठरतं.