दक्षिण आफ्रिका दौऱ्यानंतर विराट कोहलीने भारतीय संघाचे कसोटी कर्णधारपद सोडले आहे. कोहलीनंतर टीम इंडियाचा कसोटी कर्णधार कोण होणार, हा प्रश्न सर्वांच्या मनात घोळत आहे. यावर बीसीसीआयचे अध्यक्ष सौरव गांगुली याने प्रतिक्रिया दिली आहे. यासोबतच त्याने अजिंक्य रहाणे आणि चेतेश्वर पुजारा यांच्या कसोटी सामन्यांबाबतही चर्चा केली आहे.
टीम इंडियाच्या नवीन कसोटी कर्णधाराच्या प्रश्नावर गांगुली म्हणाला, कर्णधारपदाचे काही निकष आहेत आणि त्यात जो कोणी बसेल, तो भारताचा पुढील कसोटी कर्णधार असेल. मला विश्वास आहे की निवडकर्त्यांच्या मनात एक नाव असेल आणि ते अधिकारी आणि सचिवांशी चर्चा करतील. ते येत्या काळात लवकरच जाहीर करतील.
रहाणे आणि पुजाराच्या दक्षिण आफ्रिका दौऱ्यातील कामगिरीवर बरीच टीका झाली होती. कसोटी संघात खेळणाऱ्या या दोन खेळाडूंबाबत विचारले असता, ते रणजी ट्रॉफी खेळतील कारण ती श्रीलंका मालिकेपूर्वी सुरू होणार आहे. त्यानंतर निवडकर्ते निर्णय घेतील. रणजी ट्रॉफी एलिट गट फेब्रुवारीच्या तिसऱ्या आठवड्यात सुरू होतील आणि मार्च मध्ये श्रीलंकेचे कसोटी सामने होतील. निवड समिती जे काही निर्णय घेईल तो सर्वस्वी त्यांचा निर्णय असेल.
भारत आणि श्रीलंका यांच्यात कसोटी मालिका खेळवली जाणार आहे. ती मालिका २५ फेब्रुवारी पासून सुरू होणार आहे. या दोन संघांमध्ये दोन सामने होणार आहेत. वेळापत्रकानुसार, पहिली कसोटी २५ फेब्रुवारी ते १ मार्च या कालावधीत बेंगळुरू येथे खेळवली जाणार आहे. तर दुसरी कसोटी ५ मार्च ते ९ मार्च दरम्यान मोहालीत खेळवली जाणार आहे.
दक्षिण आफ्रिकेविरुद्धच्या तीन सामन्यांच्या कसोटी मालिकेत चतेश्वर पुजारा आणि अजिंक्य रहाणे यांची बॅट शांत राहिली होती. जिथे पुजाराने ६ डावात २०.६७ च्या सरासरीने १२४ धावा केल्या होत्या. तर दुसरीकडे रहाणेने ६ डावांत २२.६७ च्या सरासरीने १३६ धावा केल्या होत्या. दक्षिण आफ्रिकेविरुद्धच्या मालिकेत १-२ अशा पराभवानंतर दोघांच्याही खेळीवर प्रश्न चिन्ह उपस्तिथ झाले आहेत.
चेतेश्वर पुजाराने ९४ कसोटी सामन्यात ६६६१ धावा केल्या आहेत. यादरम्यान त्याने १८ शतके आणि ३२ अर्धशतके आपल्या नावावर केली आहेत. त्याचवेळी, अजिंक्य रहाणेने ८१ कसोटी सामन्यांमध्ये ४९२१ धावा केल्या आहेत, त्याच्या नावावर १२ शतके आणि २५ अर्धशतके आहेत. आता क्रिकेट चाहत्यांच्या मनात हा प्रश्न उपस्थित होत आहे की, चेतेश्वर पुजारा आणि अजिंक्य रहाणेला किती काळ कसोटी क्रिकेटमध्ये संधी देणार?